Atea zabalik daukazu

    Udako Euskal Unibertsitateak hogeita hamahirugarrenez antolatzen ditu udako ikastaldiak. Aurtengo honetan, Miarritze, Iruñea eta Eibarren gainera, etengabeko biziberritzean. Aukera zabala eta askotarikoa UEUko sailek antolatutako ikastaro hauetan, urtean zehar landutako gaiak baitakarzkigute udako egoitzetara, eta zabal-zabalik ditugu ateak zuretzat.

    UEUren udako ikastaldiak unibertsitario euskaldunen bilgune izateaz gainera euskal kulturaren erakusleiho txiki bat ere badira. Hauek antolatzea oraindik ere beharrezko jotzen dugu, beren bitartez, komunitate unibertsitario euskaldunak elkarren berri duelako, elkar ezagutu, lanak, proiektuak, ikerketak partekatu,.... UEUren udako ikastaldiak unibertsitario euskaldunen bilgune eta kohesio-gune dira. Dagoeneko Unibertsitateetako irakasle euskaldun belaunaldi batzuk igaro dira UEUren ikasgeletatik eta, oraindik ere, ikus daitezke belaunaldi berrietako irakasleak gure ikastaroetan, behin eta berriz zeharkatu dituzte gure ateak eta aurtengoan ere zabalik dituzte.

    Unibertsitateko ikasleek, bestelako erreferentzia izan ohi dute UEUko ikastaroetan. Hurbilagoa, irekiagoa, anitza eta alaia. Ikasleek eurek izaten dira UEUko ikastaroen protagonista nagusiak. Ekarpenik interesgarriena, UEUko ikastaroetan bizi ohi den etengabeko berrikuntza eta diziplinartekotasun giroa da. Hezkuntza eta kulturaren hedapena bere gordinean agertzen da gure ikastaro hauetan. Gehienak beren ikasketetan sakontzeko asmoz badoaz ere, hainbat, osatze asmoz, beste jakintzatan murgiltzen zaizkigu. Ez dago hesirik, ez mugarik. Nornahik zernahi egin dezake. Gogoa da eskatzen zaion baldintza bakarra. Gure ikastaroak gazteak dira gazteak direlako gehien hurbiltzen zaizkigunak. Baina, gurasoak eta seme-alabak elkarrekin ikusi ahal izan ditugu inoiz ikastaroetan, beti gazte. Pozgarria da, zinez, eta horregatik zabaltzen dizkiegu aurten ere ateak.

    UEUren udako ikastaroak Euskal Kulturaren garapen eta hedapenerako beharrezkoak dira. Euskal Kulturak ez du plaza askorik, ez dauka hedapenerako baliabide askorik. UEUren udako ikastaldietan euskal kulturaren berrikuntzak leku berezia izaten du. UEU Euskal Kulturaren berezko plaza dela esan genezake. Eta horrela da, UEU bera Euskal Kulturaren erraietatik sortua izan delako. Ikastaldietako saio osagarrietan UEUk aukera zabala eskaintzen du kulturaren alderdi desberdinetako ekarpenak ikusteko, entzuteko eta gozatzeko. Ate eta leihoak zabaldu eta plazara irteteko asmoa dugu aurtengo udan berriz ere.

    UEU Euskal Herriko gizartearen ekimenek sortua da, Euskal unibertsitatea aldarrikatzeko eta Euskal Unibertsitatea bera errealitatea izan dadin lan egiteko, eta horrexegatik, gizarte osoari irekitako ikastaroak dira UEUk antolatzen dituenak. Aurten, ohi moduan, Euskal Herriko hiriburu zaharrean, Iruñako ateak zabalduko ditugu; baita udako oporralditako Lapurdiko Miarritze xarmangarriarenak ere, eta lehenbizikoz Eibar, langileriaren hirikoak ere zabal-zabalik izango ditugu, jakituria eta ezagutzaren gizartean eskubide osoko pertsonak izan gaitezen.

Bertan topo egingo dugulakoan.

Lore Erriondo Korostola
UEUko Zuzendaria